’’الوظیفۃ الکریمۃ‘‘ اعلیٰ حضرت امام اہلسنّت الشاہ امام احمد رضا خان بریلوی قدس سرہ کا مرتب کردہ اوراد و وظائف کا مجموعہ ہے، جسے انجمن ضیائے طیبہ کے شعبۂ ضیائی آئی ٹی ونگ نے موبائل ایپلی کیشن میں تبدیل کیا ۔

اعلیٰ حضرت نے اپنے اس حسین مرقع میں خواص و عوام سب کے لیے نفع بخش اذکار کو جمع فرمایا اور ہم سب پر یہ احسان فرماگئے کہ اس کے جملہ وظائف و اعمال کی اجازت پڑھنے والے کو مرحمت فرماگئے ہیں۔

’’الوظیفۃ الکریمۃ‘‘ میں آپ نے صبح و شام اور پانچوں نمازوں کے بعد کے اوراد و وظائف اور ان کے فوائد تحریر فرمائے ہیں۔ ساتھ ہی ذکرِ خفی کے پانچ مخصوص طریقے بھی ذکر کردیے ہیں۔ نیز آخر میں تصورِ شیخ کا طریقہ بھی ارشاد فرمادیا ہے۔

آج کے پر آشوب زمانے میں خانگی، معاشی پریشانیوں میں مبتلا ہوکر اکثر افراد جسمانی و روحانی اور اذہانی تکالیف کے باعث راحت و عافیت و سکون سے محروم ہوجاتے ہیں۔ ایسے لوگوں کے لیے ’’الوظیفۃ الکریمۃ‘‘ ایک نعمت، گراں قدر گنجینہ اور ایمانی استقامت کا خزینہ ہے۔

انجمن ضیائے طیبہ نے اپنی اشاعتی شعبے کا آغاز بھی ’’الوظیفۃ الکریمۃ‘‘ سے کیا، اور اسے کثیر تعداد میں شائع کرکے خواص و عوام میں مفت تقسیم کیا۔

’’الوظیفۃ الکریمۃ‘‘ کی اس موبائل ایپلی کیشن کی ترتیب و تزئین کا کام چیئرمین انجمن ضیائے طیبہ مولانا سیّد محمد مبشر قادری نے کیا۔ جس میں ہر وظیفہ کے ساتھ اس کی سرخی، فوائد اور حوالے کو احسن انداز میں پیش کیا ہے۔